Marillion, Grendel, a hynny i gyd
Ar yr un llaw, sut wnaeth band mor anhygoel o anghŵl a derivitive lwyddo llenwi Odeon Hammersmith a chyrraedd rhif 1 yn y siartiau yn yr 80au cynnar?
Ar y llaw arall, wnes i grio uwchben y sinc wrth wrando ar hon bore ddoe.
Does dim esgus yn y byd, mae e tu hwnt i bob dadl “pleserau euog”. Dw i’n gwybod yn iawn y dylwn i fod wedi bod yn gwrando ar Joy Division neu rywbeth, ond y gwir syml yw, yn 1983, yn y myddarffycin Waun, doedd dim byd yn well na hyn:
Nid bod neb yn darllen o hyd, ond oedd gan fy ffrind M.O., yr un wnes i deithio gyda fe i Lundain bell i weld y bois ‘ma, Mini 1275 GT gyda’r enw “GRENDEL” yn y striben haul. Mae’n haws ffeindo trivia am y band di-werth yma ar y we nag yw e ffeindio tystiolaeth marwolaeth gwastraffus nghyfaill. Ac er eu bod yn ddi-werth, wrth gymharu â Velvet Undergrounds, Van Morrisioniaid a Datblygiadau’r byd roc byd eang, dw i ddim yn credu y bydd yr un band arall â’r gallu torri nghalon mor gyson â’r band yma.
Noson Datblygu yn Aber
Hir bu’r aros, ond mae sesiynau Peel gan Datblygu yn cael eu rhyddhau ar CD am y tro cyntaf. I lansio’r CD - a fydd yn cynnwys y ddau sesiwn ola, sy erioed wedi’u rhyddhau yn swyddogol o’r blaen - mi fydd noson o ffilmiau bychain yn y Drwm yn Aberystwyth.
Manylion llawn ar Feibl Datblygu.
w00t!
Hanes “Hallelujah”
“It Doesn’t Matter Which You Heard”, erthygl wych ar hanes cân Leonard Cohen Hallelujah, o’r ail-fersiwn cynnar gan John Cale, i fersiwn iconaidd Jeff Buckley, i’w lle presenol fel y gân i fynd amdani pan mae angen cerddoriaeth gefndirol i “sad montage” mewn opera sebon neu sit-com. Un o brif bwyntiau’r awdur yw bod ‘na ddim ots pa fersiwn yw’r un glywi di’n gyntaf, a does dim ots pa mor bell mae’r broses o gomodificeiddio (mae’n flin ‘da fi) y gân yn mynd - ac mae wedi’i chanu ar American Idol erbyn hyn - dyma un o’r caneuon prin ‘na sy’n mynd yn syth at dy galon, fel taw tithau yw’r person cyntaf i’w chlywed erioed.
Fersiwn y Leni Mawr clywais i gyntaf, wedyn Buckley sbo, ac mae’r ddau fel petai yn byw yn stafelloedd gwahanol nghof cerddorol. Dim un sy’n rhagori ar y llall, ac os ydw i’n troi at fersiwn Buckley yn fwy aml nag at y gwreiddiol, ei rinweddau megyddol sy’n gyfrifol am hynny: mae’n fel pigiad morffîn pan dw i’n teimlo’n isel.
Ond, eithr ac aros funud, diolch i’r trafodaeth ar Metafilter, dw i wedi darganfod fersiwn newydd i fi, sef yr un isod recordiwyd gan k.d.lang yn 2005 yn Sydney. Os ydy hi’n wir, fel y hawliwyd yn yr edefyn ar Mefi, taw cân am ryfeddodau’r orgasm benywaidd yw Hallelujah, dyna un rheswm arall i ddifaru bod k.d. yn chwarae i dîm Sappho.
(O.N. Peidiwch chwilio YouTube am fersiwn Jon Bon Jovi. Does dim un gân yn y byd sy mor gryf â hynny.)
Ysbrydion Reznor am ddim
Mae Nine Inch Nails wedi rhyddhau albym newydd, Ghosts sydd ar gael i’w lawrlwytho nawr (ond mae’r safle yn cael ei hamro ar hyn o bryd). Os tala di’r $10 am ddau CD cewch chi lawrlwytho’r cyfan am ddim yn syth, a chei di’r CDau yn y post unwaith maen nhw’n cael eu rhyddhau yn gynnar ym mis Ebrill. Os nag oes ots ‘da ti am gael y CD, cei di’r cyfan am $5, mewn sawl fformat: MP3, Apple lossless, FLAC…
Ddim yn siwr os wyt ti moyn talu $5 am y 36 trac? Cei di lawrlwytho’r 9 trac cyntaf yn rhad ac am ddim. Dyna beth dw i’n neud nawr.
Mae’r holl beth ar gael dan drwydded Comins Creadigol - os wyt ti’n talu $75 am y fersiwn “deluxe” cei di ail-ficsio’r cynnwys a’u rhyddhau.
Sa i wedi prynu dim byd gan NIN ers 15 mlynedd, ond dw i’n mynd i brynu hyn.
Mae hyn yn creu tipyn o stwr ar y Rhyngwe. Dyma’r trafodaeth ar Metafilter lle clywais i amdano. Dyma’r stori ar Digg.com sy wedi denu 7254 o bleidleisiau.
Gwrando ar y traciau cyntaf nawr. Fatha ambient tywyll, gwahanol iawn i’r hen stwff adeg Closer dw i’n gyfarwydd â fe. Dim canu.
Mae’r traciau am ddim ar gael yma hefyd.
7278 o bleidleisiau.
Dragonette vs BMX
1. Cer i wefan Dragonette. Wyt ti wedi clywed amdanyn nhw? Do’n i ddim, ond dw i’n hen. Dw i’n siwr bod y cŵl cids i gyd yn gyfarwydd. Eitha neis, ta beth. Mae’r fideo ar y tudalen blaen ddim cweit yn saff i’r gweithle, gyda’r llaw.
Ond…
2. Clic ar y linc “Videos”.
3. Gwylio’r fid Get Lucky vs. BMX.
4. Yikes.
Oh no! Steve Hillage!
Fideo mewn 8 rhan o Steve Hillage yn ei bomp. Siwr o fod y “freak” cyntaf i mi glywed - diolch i gasgliad recordiau Tina, chwaer fy ffrind Tony. Methu cysylltu yn syth at y fideo, yn anffodus, felly bydd rhaid mynd draw i eichTiwb i’w weld.
Roedd yn hawdd chwerthin ar ben rhywun fel Hillage yn yr 80au, ond tra bod pobl fel John Lydon wedi ymuno â’r byd sioeau realiti a comeback pob 5 mlynedd, mae Hillage wedi cario ymlaen heb becso dam. Mae ffasiwn yn croesi ei lwybr pob 10 mlynedd neu rywbeth, ond ti’n cael yr argraff bod hyn ddim yn bwysig iawn i’r boi.
Mae lot o Hillage ‘da fi ar feinyl, ond dim lot ar CD. Dyma un trac i chi, rhag ofn bod chi ddim yn gyfarwydd.
Steve Hillage - Light In The Sky
Mae hon yn dod o’r albym cyntaf i mi glywed, yn lolfa Tony R, nôl yn 1979 mae’n debyg. Dylwn i fod wedi bod yn gwrando ar Joy Division, siwr o fod, ond anodd dweud mod i’n dyfaru cael fy magu ar y stwff gwallgo ‘ma. Rhaid mod i ddim wedi gwrando mewn blynyddoedd maith, achos dim ond nawr dw i’n sylwi bod Gilli Smyth yn dyfynnu Captain Beefheart yng nghanol y gân.
Amser cael fy nglis arno.
Ffa Coffi ar EichTiwbs
Ac un o’r caneuon Cymraeg cyntaf i mi bopo iddi hi:
Sic Alps
Des i ar draws hwn ar hap, anghofio sut nawr. Ond mae’n wych.
Ac mae ganddyn nhw gân am Arthur Machen. Ie, yr Arthur Machen yna. Siwr o fod.
Mae ganddynt un o’r gwefannau gwaethaf erioed. Mae ‘na fandiau Cymraeg gyda gwefannau gwell na hynny.
Mae cwpl o MP3s fan hyn a fan ‘co.
Mae fan neis ‘da nhw.
Flower Travellin’ Band
Sa i wedi lanlwytho MP3 ers sbel, ond dw i’n gwybod bydd o leia un darllenwr cyson y blog wrth ei fodd â hyn, sef y cyfar fersiwn Sabbath cyntaf erioed, gan un o fandiau mwya dylanwadol y sîn Siapan yn y 70au cynnar, Flower Travellin’ Band
Flower Travellin’ Band - Black Sabbath (MP3, 12MBish)
Yn ôl Julian Cope, nid ail-fersiwn yw hwn:
For a start, Flower Travellin’ Band do not cover the song “Black Sabbath”. Instead, they let its tyres down and ride it across a ploughed field. They do to it what no British band ever could have done. The 4/4 becomes an ambient metal assault over which Joe sings the lyrics when he himself feels like it, rather than following any of the original’s tension.
Mae’n werth traco lawr yr albym (ar gael o Amazon). Mae ganddo cwpl o “gyfars” gwych eraill - 21st Century Schizoid Man ac, ym, House of the Rising Sun - ac un o gloriau mwya roc a rol yr adeg.
“Krautrock gan Judas Priest”
Yn ôl y blogiad lle ffeindiais i’r fideo isod, dyna sut gaeth yr awdur ei gyflwyno at gerddoriaeth Circle. Y blaenaf o’r bandiau NWOFHM (hi, Maff!), mae Circle yn ddim byd os nad yn gynhyrchiol: eu halbym byw Rakennus oedd seithfed CD o’u heiddo yn ystod 2007, sef mwy o recordiau nag mae rhai bandiau yn rhyddhau mewn 20 mlynedd.
Hiraeth 8-bit
(Dyw’r sgript del.ico.us ddim yn gweithio - efallai bydd mwy o flogiadau go iawn ‘ma am sbel.)
Mae Super Button yn label gwe sy’n arbenigo mewn chiptunes. Mae popeth am ddim.
Ffeindiais i’r linc ar MySpace Henna Dress, sydd eisiau llosgi dy lygaid ma’s o dy ben, a hwnna o’r edefyn ‘ma ar Mefi.
Ffleiars Pync Roc Arizona
Archif o ffleiars pync roc o Tucson, Phoenix a Los Angeles, o’r adeg 1982-1984. Hefyd, mae ‘na dudalen o MP3s sy’n cynnwys sioe Hüsker Dü yn Tucson, gyda rhyw 30-40 o bobl yn y cynulleidfa. Mae’r band yn gachboeth, ac mae’r set yn cynnwys ail-fersiynau caneuon Donovan a’r Troggs.
Da ‘di’r Dü.
Janis Ian ar briodas hoyw
Trwy My Gay Nerve.
Hefyd, Janis Ian “At 17″.
Emynyddiaeth Appalachia
Pori yn Llyfrgell Digidol Appalachia lle des i o hyd i gasgliad o emynau mewn steil traddodiadol yr ardal, sef “lined-out hymnody”. Mae’r dull ‘ma wedi goroesi ymysg rhai o Fedyddwyr Kentucky.
Dyma Jeff Todd Titon yn disgrifio’r arddull:
The leader sings the very first line, and the congregation joins in when they recognize the song. After that, the song proceeds line by line: the leader briefly chants a line alone, and then the group repeats the words but to a tune that is much longer and more elaborate than the leader’s chant or lining tune. Music historians call this procedure lining out.
Ceir clywed ambell i enghraifft fan hyn ac mae CD ar gael.
Mae arddull gyda ei wreiddiau yn yr ynysoedd hyn, ac mae dull traddodiadol Gaeleg yr Alban dal yn fyw. Yn wir, mae ‘na rhai sy’n olrhain gwreiddiau cerddoriaeth sanctaidd pobl duon America yn ôl trwy meistri ceithweision i ynysoedd ac ucheldiroedd yr Alban.
Yn flaenorol: Ffidlera ar yr Hen Ffin - cerddoriaeth werin Appalachia.
Gol. Diolch i Philippa am fy atgoffa am draddodiad brodorol Cymreig o ganu pwnc.
Blwyddyn Newydd Dda! Na, wir i chi!
Falle nad yw’n dda, yn garmigaidd, i ddechrau blwyddyn newydd gyda blogiad am rhywbeth mor ddiflas â thrafod vanitas. Pan wnes i ddileu’r blog neithiwr, dyfynnais i gwbled gan Philippa:
Pa angen dim amgenach
Na’r awr, ‘nawr, o fod yn iach.
Dyna’r ysbryd dw i am gadw ato eleni. A does dim byd yn ymgorffori ysbryd Eros fel cerddoriaeth pync digyfaddawd America yr 80au.
Take it away, Bob…
A dyma MP3 fel anrheg bach ymddiheurio-i-fy-hunan-am-fod-mor-negyddol-weithiau:
Hüsker Dü - Sorry Somehow (6Mb) - o’r albym Candy Apple Grey.
Shimmy-Disc
Erbyn i mi bennu’r cofnod hwn, mae’n debyg bydd Pigion y Dydd wedi ymddangos ar y blog, sydd dim byd byd ond lincs ambyti bandiau ar y label Shimmy-Disc. Nôl yn yr 80au hwyr a dechrau’r 90au, cyn i Nirvana a’r we sbwylio popeth i bawb, oedd gweld logo Shimmy-Disc ar gefn record gan fand do’t ti erioed wedi clywed amdanyn nhw, yn ddigon o reswm i roi dy ddecpunt i Mr Spiller. Dw i’n cofio prynu record lle do’n i ddim yn siwr p’un o’r geiriau ar y clawr oedd enw y band, a p’un oedd teitl y record - ac i fod yn onest, dim ond y funud hon ydw i wedi setlo’r dryswch yna, 19 o flynyddoedd yn diweddarach.
Cwmni un dyn oedd y label, a fel gyda phob label gwych mi oedd ‘na “house style” - yn union y fath steil fyddet ti’n disgwyl gan foi oedd yn arfer bod yn y Butthole Surfers.
Dyma gwpl o ffefrynnau o’r casgliad Shimmy, wedi’i ffeindio ar y we - dim ond un CD sy ‘da fi, mae popeth arall ar feinyl.
Bongwater - Nick Cave Dolls
Dogbowl - Carnival in the Swamp
King Missile - Take Stuff From Work
A dyma geiriau i’r un ola, ar ffurf cartwn ffeindiais i mewn ffansîn o’r pryd, ac sy wedi bod yn cuddio mewn copi o Cosmic Trigger ers 15 mlynedd.
Fnord, sbo.
Mwy o dalent Dinas Nevada
Beth yw e am Ddinas Nevada? Dim ond rhyw 3,000 o bobl sy’n byw ‘na, ond mae hynny yn cynnwys Gary Snyder, Terry Riley a Joanna Newsom.
Mae hefyd yn gartre i Noah Georgeson, cerddor/cynhyrchydd sy wedi gweithio gyda Newsome, Banhart, Bert Jansch ac eraill, ac sy bellach wedi rhyddhau ei albym ei hun - clywir fersiynau acowstig o’r caneuon o hwnna yn y sesiwn radio yma.
Wedyn mae ‘na Mariee Sioux - darllenais i amdani hi yn Arthur y bore ‘ma wrth eistedd ar yr orsedd (lle dw i’n darganfod y rhan fwya o’m cerddoriaeth newydd y dyddiau ‘ma). Cantores “gwerinol” yw hi, gyda thinc o arallfydolrwydd Newsom amdani. Pethau i’w lawrlwytho fan hyn.
Ac mae Alela Diane, Casual Fog, Kings and Queens (oedd yn arfer bod yn aelodau cyn-fand Newsom, The Pleased), ac, wel, mae hynny’n ddigon, siwr o fod.
Sut mae hwn yn digwydd? Rhywbeth yn y dŵr? Neu dim ond lot o rieni hipiaidd?
Gol: mae Utah Phillips yn byw ‘na hefyd.
Vetiver ddim o’r un Ilk
Sawl wythnos yn ôl, wedi darllen erthygl ar Richard Youngs, es i Amazon ac ordro CD gan ei fand “proto-prog” Ilk. Pan cyrhaeddodd y disg, o’n i bach yn siomedig - nid prog mohoni, ond rhywbeth tebyg i stwff Devendra Banhart.
Dim byd yn erbyn Defi blew, ond nid beth o’n i’n disgwyl.
Ddim yn meddwl mwy amdano ar y pryd. Pethau i’w neud, pobl i’w gweld.
Neithiwr, chwarae’r CD eto, wrth fynd trwy’r holl stwff dw i wedi prynu yn diweddar. Eto, meddwl bod dim ffordd disgrifio’r gerddoriaeth ‘ma fel prog o unrhyw fath. Wedi dweud hynny, mae’n eitha da, a rhywbeth hoffwn i wrando arno fwy. Yn y peil “i’r iPod” gyda fe ‘te.
Y bore ‘ma, rhoi fe yn y Mac, aros i iTunes wneud ei stwff a ffeindio manylion y traciau ac ati, a dyna fe: nid Ilk yw e o gwbl, ond albym cyntaf Vetiver. Mae label y CD yn dweud ILK, ond Vetiver biau’r cynnwys.
Wedi dweud wrth label Ilk - tybed a ga’i gopi o’r CD cywir ganddyn nhw?
Animal Collective - Peacebone
Sengl o’r albym newydd Strawberry Jam a ddaeth ma’s heddi.
Os ti’n darllen hyn heno ‘ma, nos Lun, falle bydd yn syniad i ti beidio gwylio’r fideo nawr. Gad iddo fe fd tan yfory. Wir i ti, ti ddim moyn gweld hyn jyst cyn mynd i’r gwely.
Dyn Gwyrdd @ Partly Porpoise
Mae Partly Porpoise wedi bod yn postio MP3au o’r Dyn Gwyrdd, gan gynnwys un o’r uchafbwyntiau personol i fi, Vetiver yn cyfro Hawkwind.
Sweeet.
Next Page »