Dw i newydd archebu cardiau indecs o Amazon, gan eu bod nhw’n rhad iawn (45c y pecyn o 100) a dw i’n defnyddio lot ohonyn nhw yn y dosbarth. Fel dw i’n arfer neud wrth archebu stwff o Amazon, gwthies i’r botwm “Archebu Un Glec”, ar ôl dewis 5 pecyn o’r cardiau. Beth dw i ddim yn arfer wneud, ond wnes i’r tro ’ma, yw darllen yr ebost sy’n dod o Amazon i gadarnhau’r archeb.

Lwcus i mi wneud y tro ’ma; mae’r cwmni its_surplus wedi siarsio £22.50 fel tâl cludiant.

Dw i wedi cysylltu â’r cwmni i ganslo’r archeb, ond dw i ddim yn disgwyl y bydd hynny yn effeithiol, a dw i ddim ynhyderus iawn y bydda i’n gallu cael fy arian yn ôl heb fynd i lot o drafferth. Trafferth y byddwn i, siwr o fod, yn talu £22.50 i’w osgoi.

Pa mor aml ydy hyn yn digwydd, tybed? Prin iawn dw i’n sylwi ar y tâl cludiant wrth ordro pethau o “gyfeillion Amazon”, gan feddwl eu bod nhw’n siarsio yn ôl rhyw fodel sy’n cael ei osod gan Amazon ei hun. Unrhywun wedi cael ei ripo off fel hyn gan un o ffrindiau ein ffrind mawr yn Abertawe?