Pictiwrs.com

Dr Strangelove or: How I Learned to Stop Worrying and Love the Bomb (Stanley Kubrick, 1964)

Y ffilm a fu'n binacl i'r Rhyfel Oer yw'r ffilm ddiweddaraf yng Ngwyl Ffilm Caerdydd, sef Dr Strangelove, ffilm y gellid dadlau hefyd a fu'n binacl i yrfa Peter Sellers. Mae'n glasur o baranoia milwrol, ac yn berthnasol iawn i'r hinsawdd gwleidyddol cyfoes.

Afraid yw dweud gormod am y ffilm, gan ei bod hi bellach yn ddeugain oed ac wedi'i dadansoddi, ei hadolygu a'i dehongli hyd syrffed. Ond profiad arbennig oedd cael bod yn y sinema er mwyn ei gweld ar y sgrin fawr am y tro cyntaf. Roedd perfformiadau ardderchog Sellers fel Capten Mandrake, Arlywydd Muffley a Dr Strangelove, George C. Scott fel Buck Turgidson, a Sterling Hayden fel Jack Ripper yn cael eu hamlygu'n fwy, ac yn dangos yr amseru gwych sy'n perthyn i elfennau comedi y ffilm.

Ond amlygwyd hefyd yr arswyd a'r paranoia a oedd yn perthyn i'r oes honno, wrth i'r ffrwydriadau a'r bomiau gael eu chwyddo, ac y daeth diriaeth y sefyllfa yn hollol blaen o'n blaenau. Mewn oes lle mae trais a marwolaeth yn cael ei bortreadu ar ein sgriniau bob nos ar y newyddion, roedd gweld ffilm lle mae paranoia a syniadau tywyll yn ffordd o fyw yn amheuthun. Nid trais a welwn ond bygythiad ac ofn trais, rhywbeth y mae Kubrick yn chwarae arno'n dda, a rhywbeth sy'n cadw'r cymeriadau a'r gynulleidfa dan barlys braw. Dyma un o glasuron y byd ffilm.