Swtra’r Arth Mwglyd
Fersiwn dyb-aidd Pwyleg o gerdd Gary Snyder Smokey the Bear Sutra. Peth o Gil Scott-Heron yma, ond yn fwy byth, fersiwn Llwybr Llaethog ac Ifor ap Glyn o’r clasur The Revolution Will Not Be Televised.
[Gol.]
Hefyd, High Peak Haikus, portread o Synder yn y Guardian yn 2005. Collais i hwn tan nawr.
Map Cymru yn y “Dead Zone”
Tipyn bach o ddim byd, ond o’n i’n gwylio’r ffilm Cronenberg The Dead Zone y bore ‘ma (ffilm wych do’n i ddim wedi gweld ers blynydde - mae Nic yn dweud sieco fe ma’s) pan welais i rywbeth od ar y wal yn nhŷ Christopher Walken:
Os nad ydy hynny yn ddigon sgêri, mae Walken am fod yn Arlwydd yr UDA yn 2008.
Mae’r pigion yn eu hôl
Os edrycha di i’r dde (fy chwith i), mi weli di restr o ddolenni. Wnes i dreulio rhyw awr chwarae gyda sgriptiau php ac yn y blaen i greu’r fath rhestr, cyn darganfod bod deli.icio.us yn cynnig y wasaneth erbyn hyn.
Dw i’n edrych nawr am ffordd i ychwanegu rhywbeth tebyg i maes-e.
Albym[s] y Dydd #3 - prog 1973
Tipyn o waith i’w wneud ar y cyfrifiadur heddi, felly edrych am rywbeth alla i chwarae yn y cefndir, sy ddim yn debyg i dynnu fy sylw gormod. Mae gen i lot fawr o albyms prog Ewropiaidd, yn enwedig o’r Eidal a’r Almaen, sy ddim wedi cael chwarae teg gen i hyd yn oed, felly dyma fi droi at rhai o reiny. Wedi creu rhestr chwarae o bob record prog o 1973 sy ‘da fi, gawn ni weld faint ohonyn nhw dw i’n mynd trwyddo heddi. Bosib bydd y cofnod yma yn tyfu trwy’r dydd. Bosib hefyd y bydda i wedi cael llond bol o gopiwyr Genesis a Gentle Giant erbyn amser cinio.
Yr un cyntaf yw enghraifft clasurol o’r syndrom yna: albym cyntaf gan Acqua Fragile, progwyr o’r Eidal. Mae dylanwad Genesis mor drwm ar y band fyddai rhywun sy ddim yn gyfarwydd iawn â dyddiau cynnar Gabriel a’i griw yn meddwl taw nhw oedd hyn ar y gwrandawiad cyntaf. Dim byd yn bod ar hynny, dw i’n hoffi Genesis cymaint â’r hipi nesa, ond unwaith ti’n dechrau gwrando bach yn fwy gofalus, ti’n clywed band sy ddim yn canu yn eu hiaith gyntaf, ac sy heb lawer o syniadau gwreiddiol. Rhannau bach chwaraeus Gentle Giant-aidd, llafurganu Jon Anderson-aidd. Mae’n ddigon dymunol, ond dim byd doedd bandiau Lloegr ddim wedi’iu wneud yn 1971.
[Gol.] Mae’n dechrau tyfu arna i. Falla hwn bydd Albym y Dydd, wedi’r cwbl.
Cofnod wedi’i ddileu
Gan nad yw’n bosibl i gael unrhyw drafodaeth call gyda Martin Llewelyn Williams, does dim dewis ‘da fi ond ei wahardd o’r blog hefyd. Fydd dim sylwadau ar y cofnod hwn, a bydd unrhyw sylwadau eraill ganddo yn cael eu dileu yn syth. Bydd copiau o’i negeseuon ebost yn cael eu harchifo, ond fydd dim ymateb.
Diolch i’r rhai sy wedi cysylltu i gynnig cyngor i fi. Dw i ddim yn meddwl bod angen cysylltu â’r heddlu eto, ond gawn ni weld.
Ar Mark Kermode mae’r bai
Gwrando ar bodlediad Mark Kermode, a chan bod dim byd well ‘da fi wneud gyda fy nwylo (ahem! taw yn y cefn!), hwpo ymadroddion ar hap o’r darllediad mewn i Google i weld beth sy’n dod lan.
Ti rili ddim moyn dy bartner cerdded mewn i’r stafell pan ti’n Gwglo oiled men in their pants, ond mae’n ffordd dda o ffeindio pethau fyddet ti ddim wedi gweld fel arall. Oni bai dy fod di’n chwilio am bethau fel hyn yn aml.
Ta beth: Hot Chicks With Douchebags - dyna’r ystyr trosiadol o’r gair ola, nid rhyw pornfa rhyfedd o Siapan, ni phoener. Wedi dweud hynny, poener tipyn bach, oherwydd nid safle reit-on iawn yw hwn, chwaith. Mae lefel y hiwmor yn lled isel, ond mae lled iselrwydd yn iawn bob hyn a hyn, ond yw e? A beth arall wyt ti’n disgwyl o safle sy’n casglu lluniau o ddynion hyll/nerdy/smyg/hen gyda merched del? Beckett?
Sôn am Sammy B, gydag ymddiheuriadau os ydw i wedi dwyn hyn o flog Cymraeg arall (dw i ddim yn cofio sut des i ar ei draws): Pitch ‘n’ Putt with Joyce ‘n’ Beckett. Ddim yn saff i’r gweithle - ond os ti’n darllen hyn yn y gweithle ti’n haeddu popeth ti’n cael.
Dw i dal mewn hwyliau da wedi dysgu (chwe mis ar ôl i weddill y byd, siwr fod) bod y Welsh Christian Party yn cael eu hariannu gan freindaliadau o’r anthem disgo So Macho. Diolch i’r Hen Rech Flin am ddod â fi i fyny i gyflymder ar y pwnc llosg yma.
Diwrnod fishi ddoe. Cynhadledd yn Rhos y Gilwen yn y dydd, ynglŷn â chynaladwyedd, iaith, cymuned a phob dim sy’n dda yn y byd. Caws neis hefyd. Braf cwrdd â’r Mab Afrodlon o’r maes. Dw i wastad bach yn araf wrth gwrdd â maeswyr am y tro cyntaf. Sut fyddet ti’n ymateb petai dyn ifanc yn dod atat ti a dweud “Helo Nic, fi yw’r mab afradlon”. Dw i’n amau ’sai fe wedi edrych rhyw 5 mlynedd yn ifancach, byddai hyn wedi peri cryn gofid yn eich gohebydd bregus.
Syth o’r cynhadledd i Blwmp i godi Joss a mynd â fe i Raeadr Gwy am ail rownd Brwydr Bandiau C2. Tipyn o siom oedd clywed bod 2 (3?) o’r bandiau oedd wedi ennill lle yn y rownd yma ddim wedi troi i fyny, felly o’r tri band oedd am gystadlu, tri ohonyn bydd yn mynd trwyddo i’r rownd nesa. Mewn geiriau arall, oedd yr holl beth yn wastraff llwyr o amser.
Ond na! Gan fod cyfle i ni gael swper mewn tafarn fech neis (ydyn nhw’n dweud “fech” yn Sir Faesyfed? mi ddylen nhw) lle wnaeth Saesnes sefyll efo ei phen-ôl i’r tân am funud cyn iddi adael, a dweud “Just warming Gary’s supper”, punchline i jôc dw i ddim wedi clywed ers 1976.
Ac eto, na! Gan ein bod ni’n cael gweld, os na chwrdd â, ei Glynwiserwydd. Bob tro welais i’r boi, oedd giggle o ferched tamaid bach yn rhy ifanc o’i gwmpas, oni bai am ei ymddangosiadau ar y llwyfan. Daeth e ar draws fel boi digon ffein, ond sut yn y byd gaeth e swydd ar Radio Cymru, ar wahan i’r amlwg h.y. ei fod e wedi bod ar deledu y Sais.
Ac unwaith, os na dwy- neu deir-gwaith, eto eto, gan ein bod ni’n cael clywed Stonefree (un gair neu ddau?), Meibion Ffred a Gwiber. Nid oedd Stonefree yn neud cymaint o argraff arna i a wnaethon yn Cŵps wythnos o’r blaen. Tro ‘ny, cwyn beirniadaeth adeiladol Owain Shiv oedd eu bod nhw’n chwarae yn rhy uchel i’r PA - dyna yn union y peth o’n i’n lico amdanyn nhw; oedd tipyn bach mwy o fin iddyn nhw, a nhw oedd y band oedd yn edrych yn barod i fod ar lwyfan “go iawn”. Neithiwr, gyda PA oedd yn fwy na pharod i lyncu sŵn eu Marshalls, wnaethon nhw swnio braidd yn ddi-fflach, yn fy nhyb i. Mae fy nhyb yn newid yn ôl faint mae wedi’i iro, cofiwch, a nhw oedd band cyntaf y noswaith.
Mae Meibion Ffred dal i swnio’n obeithiol iawn, ond dw i’n credu y byddan nhw’n dod ymlaen yn lot glouach unwaith bod y TGAUs mas o’r ffordd a chân nhw ymarfer yn fwy aml. Wnaeth Rhys Llwyd awgrymu y gallen nhw cymryd dalen o lyfr yr Anweledig a chynnwys mwy o elfennau PARTEH! yn eu perfformiad. Gan gofio bod y bois yma dal yn yr ysgol, bydd rhaid iddyn nhw dethol yn ofalus pa dudalenau’r llyfr ‘na maent yn benthyg. Sa i’n gweld bod cael strippers a spliffs ar y llwyfan yn mynd i fynd i lawr yn iawn gyda’u rhieni ac athrawon Ysgol Dyff Teif.
Y band ola oedd Gwiber, o Lanfair Caereinion. I fi, nhw oedd y band mwya diddorol ar y noson. Mi oedd ‘na rhywbeth yn y ffordd ymlaciol wnaethon nhw fynd o gân i gân oedd yn apelio ata fi, ac oedd effaith eu sŵn yn ei gyfanrwydd yn debyg i beth welais i yn Stonefree yn y Cŵps. Mi oedd egni Stooges-aidd yma, ac o’n nhw’n disgwyl fel o’n nhw’n gyfarwydd â’r holl clichés roc a rol, heb deimlo bod rhaid iddyn nhw eu hail-adrodd. Oedd y canwr yn f’atgoffa o’r Roddy Frame ifanc, ac roedd y drymwr yn gryf iawn - jyst abowt yr unig peth o’n i’n cytuno â Rhys Llwyd amdano oedd taw hwnna oedd cerddor cryfa y noson. Edrych ymlaen at glywed mwy ganddyn nhw pan byddan nhw, a’r bandiau eraill, ar y radio yn fuan.
Ai hwn yw’r cofnod hiraf erioed? Iesgob.
Gair y dydd yw hwnna.
Iesgob.
Albym y Dydd #2 - Jon Poole - What’s the Ugliest Part Of Your Body? [1994]
Gweithiodd yr arbrofiad o gadw at un albym trwy’r dydd yn well nag o’n i’n disgwyl, felly dw i am gario ymlaen, gan ychwanegu un albym ar y tro i’r iPod.
Daeth dau CD yn y post, un yn ddetholiad o draciau gan Cardiacs a fydd yn Albym y Dydd yn y dyfodol agos, a’r llall gan Jon Poole, cyn-gitarydd i’r un band.
Yn 1993, mewn adeg gormod o egni, aeth Poole ati i recordiau rhai o’i hoff ganeuon cynnar Frank Zappa, ar ei ben ei hun, yn ei stafell wely, ar 4-trac, gyda peiriant dryms cyntefig. Cafodd y tâp o’r sesiynau yma ei ddosbarthu mewn gigs ac ati, a dim ond yn weddol diweddar (dw i’n neud hyn oll i fyny, o’ch chi wedi dyfalu?) y mae ar gael ar CD. Mae ar gael o’r Organ, ond dw i’n methu ffeindio fe ar eu gwefan, sy mor gyntefig â’r peiriant dryms mwya cyntefig yn y byd, erioed. Ffeindiais i fe ar eBay, safle ocsiwn boblogaidd.
Ie, ocsiynau ar lein, a fyddech chi’n ei gredu fe?
Dim ond dechrau y mae fy mherthynas â’r CD yma. Prynais i fe oherwydd y cysylliad Cardiacaidd, dw i ddim hyd yn oed yn hoffi Zappa. Dw i wedi ceisio hoffi Zappa, gan ei fod e’n un o’r bobl ‘na dw i’n teimlo y dylwn i fod ei hoffi, ond bob tro dw i’n gwrando ar ei stwff mae’n dod ar draws mor bell lan ei din ei hun, ac yn wreig-gasäwr o’r radd eithaf. Dydy cadw barf diddorol ddim yn wneud i fyny am wallau fel hyn mewn cymeriad dyn.
Ond erbyn hyn, mae fersiynau Poole o’r caneuon FZ o 1965-68 yn dechrau tyfu arna i, i’r pwynt lle, efallai, dw i’n barod cyfadde mod i wedi colli rhywbeth gan osgoi Zappa hyd yn hyn.
Hefyd, mae Jon Poole â llygaid mawr iawn.
[Gol.]
Oh, gwon te. Dyma MP3 i chi:
Jon Poole - Flower Punk (ail-fersiwn Frank Zappa) 3.3MB.
Gwlad y Gân
We Are a Musical Nation - post ffantastic gan Sanddef ar y cyd-flog They All Speak English (sy wedi bod yn dawel yn diweddar; mea culpa, ymysg eraill).
Mae Sanddef wedi casglu fideos YouTube gan y goreuon o’r Sîn “Roc” Gymraeg, sy’n cynnwys llwyth o stwff dw i wedi colli. Dw i’n nabod y gân isod gan Radio Luxemburg, er enghraifft, ond dw i erioed wedi gweld y fideo gwych gan fy mod i bron iawn yn gwylio S4C. Dim byd yn erbyn y teledu ei hunan, jyst bod y signal digidol yma mor fregus, prin iawn mae’n werth ei wylio.
Ta beth, dyma fe, a diolch i Sanddef am atgyfodi’r blog. Rhaid i fi feddwl am rywbeth i’w roi arno nawr…
Heddwch Ecstatig
Fideos Heddwch Ecstatig, sy’n cynnwys sawl peth gan Sunburned Hand of the Man. Wnes i lwyddo colli’r band ‘ma yn y Dyn Gwyrdd y llynedd, ond gwelais i’r gitarydd a’r drymwr wneud rhywbeth rong dros ffilm Ira Cohen.
Albym y Dydd #1 - Six Organs of Admittance - Dark Noontide [2002]
Dych chi’n cofio bod yn ifanc, jyst dechrau mas ar y daith i gerddoriaeth, pan oedd arian yn brin a recordiau yn brinach byth? Dw i’n cofio’r LP cyntaf i mi brynu, a’r ail, a dw i’n cofio pan oedd 10 albym ‘da fi am y tro cyntaf. Dw i’n cofio hefyd oedd rhaid i ni’r bois rhannu’r bandiau roc rhyngddon ni er mwyn wneud yn siwr bod neb yn prynu albym oedd ‘da rhywun arall - albym allet ti fod wedi’i dapio, ac arbed y £3.50, neu beth bynnag, i brynu albym doedd neb arall wedi clywed. Doedd dim albyms Zeppelin ‘da fi, gan taw prynu popeth gan Sabbath oedd fy rhan i.
Ddôs wêr ddy deis, eh?
Ond un peth am y prinder yma, oedd bob record yn sbeshial, ac o’t ti’n fwy tebyg i dreulio tipyn o amser dod i’w nabod. Dw i’n cofio’n glir prynu’r clasur Genesis Foxtrot (sy ddim ar gael ar CD newydd? be’ sy’n mynd ymlân â’r byd?) ac eistedd ar lawr fy stafell wely gyda’r clustffoniau yn sownd ar fy mhen tan bod bob gair o Supper’s Ready yn sâff ‘da fi, a bob manylyn y clawr wedi’i serio yn fy ngho’. Roedd siwr o fod bron 30 o albyms ‘da fi erbyn hynny, a phob gair o bob cân ar bob un ohonyn nhw dal gyda fi o’r galon.
Mae gyda fi gwerth 36 diwrnod o gerddoriaeth yn iTunes, a gwerth 16.2 diwrnod o ganeuon dw i heb wrando arnyn nhw’r unwaith.
Felly, fel arbrofiad, dw i am ddewis un albym bob dydd (neu ddau) a gwrando ar hwnna a dim byd arall am sbel.
Yr un cyntaf i gael fy holl sylw, er gwell neu er gwaeth, yw Dark Noontide gan Six Organs of Admittance.
Wel, do’n i ddim yn mynd i ail-ddechrau gydag Olivia Newton-John, nag o’n i?
Mae’r iPod wedi’i weipio, a’r un record yma wedi ei lanlwytho iddo, felly fory hwn fydd fy nhgyd-deithiwr ar y ffordd i’r gwaith, hwn bydd gyda fi wrth gerdded adre, a hwn bydd gyda fi ar y ffordd i’r dafarn gyda’r nos i wynebu bois y bwrdd poker.
A tybed, mewn 25 mlynedd, a fydda i’n gallu canu Spirits Abandoned fel ydw i’n gallu canu Supper’s Ready, ac hyd yn oed…
Gawn ni weld…
[Gol.] Ychwanegaf MP3 i bob cofnod o’r fath, tra bod yr arbrofiad yn para.
Six Organs of Admittance - Awaken (MP3, 2MB)
Gwastraffu amser? Fi?
Pobl rhyfedd Basil Wolverton - archif o gloriau’r comic o’r 70au, “Plop”. [Eye of the Goof]
Golygfeydd serch Lady Chatterley’s Lover wedi’u hactio gyda cyfeiliant cerddorfaol.
Way Out Junk - blog MP3 sy’n canolbwyntio ar recordiau o raglenni/ffilmie plant o’r 60au i’r 80au, a phethau prin eraill. Popeth wedi’i rwygo o’r feinyl gwreiddiol, dim byd sy ar gael ar CD. Dw i’n dechrau gyda E.T. I Love You (and other extra-terrestrial songs for children. Wwww, a comic Alice Cooper!
Pa mor fawr yw dy sgrîn di? Pa mor fawr allai fe fod?
Llunie Moleskine Kathrin Jebsen-Marwedel. Waw.
Artistamps - grŵp Flickr i bobl sy’n wneud eu stampiau eu hunain.
Bruce Sterling @ SXSW (MP3).
Hypermiling
Erthygl MoJo ar ddyn sy’n defnyddio bob tric yn y llyfr i wasgu cymaint o filltiroedd mas o bob galwn o betrol mae’n rhoi yn ei gar.
Ellis Nadler
Lluniau Ellis Nadler - darluniwr o Lundain. Gwychder.
Mae rhagor ar Flickr.
Does dim “The”
Dim ond Cardiacs.
Hefyd:
Is This The Life? - y “hit”.
R.E.S. - clasur prog roc go iawn.
Big Ship - o’r fideo Mare’s Nest. Wedi colli fy nghopi, och a gwae.
Rhydd, eto
Diolch i Macsen am y linc.
Dileuwyd fy rogue lefel 54, a’i holl griw o gymeriadau cefnogol (paid â gofyn, os ti ddim yn gwybod). Rhoddwyd eitemau gwerthfawr i bwy bynnag oedd yn digwydd bod wrth law ym myd y gêm wrth i mi gael gwared â phopeth, ac anfonwyd dros 400 darn o aur y gêm i “Gwenllian”, yr unig siaradwr Cymraeg o’n i wedi cwrdd ar y gweinydd. Dileuwyd y gêm o’r Mac, cauwyd y cyfrif, dinistriwyd y disgiau i gyd.
Yn syth bin ar ôr wneud hyn oll, claddwyd barcud coch yn ein gardd. Ffeindion ni’r deryn marw wrth ochr yr A487 yn Sarnau pwyddiwrnod wrth i ni ddosbarthu taflenni Plaid yn yr ardal - y tro cyntaf i mi fynd am dro go hir mewn wythnosau; ers y tro diwetha i ni ddosbarth taflenni, siwr o fod. Barcud ifanc ydoedd, o’i olwg, ac un gâth ei ladd gan gar, yn ôl pob tebyg, y tro cyntaf iddo ffeindio rhywbeth da i fwyta ar lôn prsyur y brif-ffordd. Do’n i ddim am weld peth mor hardd pydru’n racs ar ochr ffordd fel ‘na.
Mae symboliaeth mor law-drwm allai fe fod wedi dod o nofel rhad, ond mae’n wir er hynny. Mae bywyd, sy’n cael ei fyw’n iawn, mor anhygoel o werthfawr, a dyna fi’n ei adael pydru ar ochr lôn fy nghaethwineb i gêm cyfrifiadur. Y gair Saesneg yw banal; mae’n drasiedi bach bod pobl yn gwastraffu eu bywydau mewn obsesiynau unigol fel hyn.
Wedi dweud hynny i gyd, a chyda popeth dw i wedi ennill gan gael gwared o’r gêm, dw i wedi colli rhywbeth hefyd. Rhywbeth sy’n amhosibl i esbonio i rywun sy ddim wedi byw yn y byd arall, hawdd, pert, dealladwy yna. Fydda i ddim yn teithio o Southshore i’r Mynachdy Sgarlet byth eto, ac mae hiraeth go iawn ynghlwm â hynny. Mae pawb yn derbyn bod heroin yn beth drwg i fod yn gaeth iddo ond prin iawn mae pobl yn dweud y gwir syml amdano: mae pobl yn cymryd heroin gan fod cymryd heroin mor anhygoel o wych. Ar heroin, ti’n gallu hedfan. Yn sobr, galla i ddweud bod y byd go iawn yn milwell na byd Warcraft, ond rhowch chi flas bach o’r melyster yna i fi, a byddwn i’n hogi fy nagerau a chwilio am y mangy nightsaber cyntaf i’w ladd.
Och.
Ych chi wedi bod yn gaeth i rywbeth fel hyn?
Y Cwt Cymreig
The Welsh Shed - set o luniau ar Flickr gan Jacob Whittaker.
John Vanderslice a’r chwyldro dosbarthu cerddoriaeth
Dw i’n prynu mwy o gerddoriaeth nag erioed yn fy myw, ond dw i ddim yn cofio’r tro diwetha i mi brynu CD gan artist do’n i ddim wedi clywed ar MP3 o’n i wedi lawrlwytho yn “anghyfreithlon”. Heb rhwydweithiau fel Soulseek, fyddwn i ddim wedi clywed stwff Joanna Newsom, er enghraifft, a dw i newydd ordro bob un o’i CDs hi, ac yn edrych ymlaen yn arw at ei gweld yng Ngŵyl y Dyn Gwyrdd yn yr haf.
Dyma gyfweliad John Vanderslice ar sioe Merlin, podlediad fideo newydd gan Merlin Mann o 43 Folders.
Dw i ddim yn gyfarwydd â gwaith Vanderslice, ond mae ei agwedd tuag at hybu ei gerddoriaeth, a’r ffordd o’i dosbarthu, yn ffres iawn, i ddweud y lleia. Dw i’n dyfynnu o’r cof:
[If you're recording and releasing music] there’s gonna be a very high percentage of your records downloaded - for free. That’s just it.
Yn lle cwyno am y peth a mynd i banig, mae John yn rhoi ei gerddoriaeth i gyd ar we, boed ar ei wefan ei hun neu gan ei anfon at blogiau MP3 mae e’n darllen yn gyson, fel Largehearted Boy.
Mae’r cyfweliad yn un ysbrydol iawn, ac mae wedi fy narbwyllo fi gwrando eto ar stwff JV (gan ei lawrlwytho, natch).
Ymgyrchu mewn cartwns
Newydd ddod ar draws Archig Cartwniau Prydain, adnodd gywch i unrhyw un sydd â diddordeb mewn agweddau y wasg Seisnig at Gymru, y Cymry, a’r Gymraeg. Dyma sawl perl o Chwefror 1970, adeg carchariad Dafydd Iwan. Symud y llygoden dros y llun i weld y capsiwn, neu roi clec i fynd at y fersiwn llawn.
Ac os ydy jôc yn werth neud, mae’n werth wneud ddwywaith.
David O’Reilly
Wofl - ffilm fer wedi’i hanimeiddio gan David O’Reilly. Troi’r uchelseinyddion i fyny a diffod y goleuadau.
Joia.
Llyfrau y Byd Arall
Canolfan Celfyddydau’r Llyfr - amgueddfa/oriel sy’n arbenigo mewn llyfrau wedi’u creu, neu eu hail-greu, gan law’r artist.
