Archifau Misol: Chwefror 2005

Ai hyn yw “blogio”?

Postiwyd ar gan

Ai hwn yw blogio? Cofnod gan Nick Cohen ar blog newydd The Observer. Unwaith eto, mae’n amlwg pa mor lydan yw’r bwlch rhwng dealltwriaeth y technoleg newydd yng nghyfryngau Lloegr, ac yma yng Nghymru. Dw i’n gwybod bod yr Observer yn fwy tebyg na’r Telegraph, dweder, i ddangos y ffordd ymlaen, ond dydy blogio, fel syniad, ddim cweit wedi cyrraedd soffa Wedi 7 eto yng Nghymru fach.

Mi fydd hi, nos Fawrth nesa, ond sut mae dyn i fod i ateb cwestiwn fel “wel Nic, beth yw ystyr blog?” mewn munud neu ddwy, gan wybod y bydd yn cael ei dorri mas o’r darn recordiwyd gan ei fod yn syniad rhy newydd i Mrs Jones, Llanrug ei ddeall? (10/1 taw’r unig pethau sy’n goroesi o’r cyfweliad wnes i bydd y darnau ble dw i’n sôn am y pethau cas sy’n cael eu dweud ar maes-e o bryd i’w gilydd.)

Mae’r Observer nid yn unig yn deall y cwestiynau sylfaenol “beth yw blog“, maen nhw’n deall, ac yn defnyddio, folksonomies, hynny yw defnyddio tagiau/allweddeiriau i gategoreiddio cofnodion ar y blog.

Mae hefyd yn gadael cofnodion y blog yn agored i unrhywun bostio sylwadau heb cael eu cymedroli (sy’n fwy na dw i’n wneud ar hyn o bryd), tra bod yr unig ffordd i hyd yn oed darllen sylwadau defnyddwyr gwefan Golwg yw cofrestru, mewgofnodi (gyda thri darn o wybodaeth i’w cofio yn lle y ddau arferol) ac wedyn ffeindio taw ti a “WALISER” yw’r unig pobl sy wedi ymweld â’r lle ers oes pys – a’r unig reswm mae ynteu yna yw ei fod e wedi cael ei wahardd o maes-e.

Mae gwefan y Cymro i lawr.

Dyw gwefan Y Byd ddim wedi’i adnewyddu ers cyn y Steddfod.

Wyt ti’n gweld pam dw i wedi postio hyn yn y categori Dyfodol yr Iaith?

*codi gwar*

Sbam, ‘to

Postiwyd ar gan

Dw i’n defnyddio’r hac bach ’ma i atgoffa pobl sy’n gadael negeeuon yma i fod yn amyneddgar. Ers i mi sylwi ar y sbam cyntaf, mae rhyw 20 darn o sbam “Texas Hold ‘Em” wedi cyrraedd, ond mae’n braf iawn i weld eu bod nhw i gyd wedi’u blocio.

Sbamwyr yn eu hôl

Postiwyd ar gan

Wel, mae wedi cymryd rhyw bythefnos iddyn nhw ffeindio’r blog yn ei newydd wedd, ond mae sbamwyr wedi dechrau postio eu rwtsh ’ma. Mae ’na sawl ffordd o’u blocio gyda WordPress, ond am nawr, gan fy mod i wedi digon o hyn am y funud, dw i wedi newid gosodiadau i wneud bob sylw dod ata i cyn iddo fe gael ymddangos ar y blog.

Mae hyn yn golygu, wrth gwrs, y bydd oedi rhwng postio sylw yma a gweld e ar y blog. Plîs, plîs, plîs, peidiwch â phostio pethau mwy nag unwaith.

Scymraeg.com

Postiwyd ar gan

A yw hi’n amser i ni feddwl am wefan tebyg i Engrish.com i’r hen iaith annwyl?

Ydy. (Noder: sdim byd i’w weld yna eto, ond dw i wedi cofrestru’r parth. Wotsh ddys speis.)

Dw i wedi sefydlu grwp newydd ar Flickr, ac wedi dechrau defnyddio’r tag scymraeg hefyd, sy’n fwy cofiadwy na’r un “awyddionerchyll” o’n i wedi defnyddio o’r blaen. Gobeithio bydd mwy o bobl yn ymuno â’r grwp ac hala mwy o luniau i mewn. Y gobaith yw y bydd modd i fwydo’r lluniau o fanna yn syth i’r wefan scymraeg.com, felly fydd dim angen llawer o waith cynnal a chadw ar y safle ei hun.

Un o'r lluniau yn y grwp Flickr Un o'r lluniau yn y grwp Flickr Un o'r lluniau yn y grwp Flickr

Lluniau Auntie P

Postiwyd ar gan

Mae Auntie P yn byw ar Ynys Wyth, ond yn hanu o Gaerdydd yn wreiddiol. Mae hi’n licio mynd i mewn yn agos ac yn bersonol, sy’n gadael iddi ddangos i ni bethau fyddwn ni ddim yn boddran gweld, fel arfer.

Mae gweld lluniau fel hyn (ac mae miloedd o bobl yn postio lluniau yr un mor hyfryd ar Flickr) yn wneud i fi deimlo yn euog mod i wedi bod mor ddiog gyda fy nghamera. Rwy’n meddwl am brynu un gwell cyn bo hir – wel, unwaith dw i wedi talu off fy mil cerdyn credyd – ond does dim esgus am beidio bod yn fwy creadigol gyda’r un bach rhad sy ’da fi nawr. Gyda llygaid clir mae tynnu lluniau da, nid gyda camera drud.

Auntie P: llechen ar wal Auntie P: 'Peth' Auntie P: poteli llaeth ar stepen drws

Constantine ddim yn gachlyd sioc

Postiwyd ar gan

Adolygiad Constantine gan Suw. Fersiwn gryno: dyw e ddim yn sugno twll din, sy’n fy synnu fi ar yr ochr gorau. Hei, es i i weld Johnny Mnemonic, 107 munud fydda i’n byth yn cael yn ôl.

Ond dw i’n ymddiried yn Suw, er ei bod hi’n cyfadde nad yw hi’n hollol ddi-duedd gan ei bod hi’n ffansio Keannu. Wel, pwy sy ddim? Dw i jyst yn synnu nad oedd hi wedi awgrymu Simon Clegg am y rôl, a dweud y gwir. Byddwn i’n llai parod i dderbyn ei barn ’sai hwnna wedi bod yn y gôt gabardîn.

Postiwyd yn Heb gategori | Tagiwyd

MP3au ar hap

Postiwyd ar gan

Mae’r band llydan yn ôl! Amser i fi ddal i fyny gyda’r holl MP3au dw i wedi bod yn aros i’w lawrlwytho. Bydd y cofnod yma yn tyfu trwy’r dydd, mae’n debyg.

Popul Vuh - In Den Garten PharaosSamplau tua un funud yr un gan Popol Vuh, y grŵp Krautrock amgylchol, ar wefan Bwylaidd.

Mwy o samplau Popol Vuh (safon is).

Edefyn Barbelith ar Krautrock. Llawer o llwybrau cam i’w dilyn o fan’na.

Dadadeiladu’r Wal – clasur paranoiaidd Roger Waters wedi’i ailddychmygu gan artistiaid danddaearol. Mae’r trac cyntaf yn wych, sai wedi clywed y gweddill eto. [Boing]

Mae gan Blogalive gwpl o fersiynau o’r trac Watch Song gan Shellac, a thri trac gan Pixies yn fyw. Dyw’r traciau ddim yn para yn hir ar Blogalive, felly rho wybod yn y sylwadau os ti wedi’u colli nhw a wna i eu postio ‘to.

Damo Suzuki yn y gwely gyda phlanhigynAc, o mai ffycin God, mae Damo Suzuki yn dod i Aberteifi. Nos Sul, Mai 30. Yip yip. Ddim yn gwybod pwy sy’n gyfrifol am fwcio’r bandiau yn y Mwldan, ond Acid Mothers a Damo Suzuki o fewn y flwyddyn yn fwy nag o’n i’n dusgwyl. Dyma gyfweliad â Damo Suzuki ar radio Awstralia – yn fwy diddorol na’ch canwr pop arferol. Jyst rhag ofn dwyt ti ddim wedi clywed o Suzuki, dyma ganwr sy mor ffycin cŵl mae Mark E. Smith yn breuddwydio am fod Damo Suzuki (MP3 o’r Fall, fel trît bach i chi – diawl, mae’n braf bod yn ôl ar fand llydan).

A, ffyc it, dyma gwpl o draciau Can hefyd.

Can – Mushroom
Can – I’m So Green

Mae MP3au ar wefan Damo Suzuki hefyd. Dw i’n fishi eu lawrlwytho nawr, ac mae ei stwff newydd yn dda iawn hefyd.

Newydd sylweddoli, wrth archebu tocyn i’r sioe, taw nos Lun yw’r 30ain, felly bydd rhaid i mi ganslo neu ail-drefnu dosbarth ar y noson honno. O wel.

Wna i bostio mwy o ddolenni MP3 yn y blwch sylwadau trwy’r dydd, os bydd amser.

Sleifar yn erbyn Shakespeare

Postiwyd ar gan

Falle fod e’n gallu handlo beirdd mambi-pambi fel Grahame Davies ac Emyr Lewis, ond ydy Sleifar yn barod i fynd wyneb yn wyneb â Wili Mawr? Mae Chris Cope yn meddwl ‘ny:

A dissertation on the microphone skills of MC Sleifar may not have the same meter or flow or beauty of a Shakespearean sonnet, but the message is the same:

I am myself with my wife. And I can’t imagine myself without her.

Araith Brian Sedgemore

Postiwyd ar gan

Yn 2003, wnes i ddysgu cwrs Wlpan yn Llambed dros y haf, gyda grŵp arbennig o ddechreuwyr. Un ohonyn nhw oedd Brian Sedgemore, Aelod Seneddol Plaid Lafur i Hackney South & Shoreditch, a wnaeth, ddoe yn San Steffan, un o’r areithiau gorau dw i erioed wedi’i darllen, a’i chlywed. Fel mae’n dweud ar ddechrau’r araith, mae’n debyg dyma’r tro ola’ iddo fe siarad yn San Steffan. Gwaetha modd.

It is a foul calumny that we do today. Not since the Act of Settlement 1701 has Parliament usurped the powers of the judiciary and allowed the Executive to lock up people without trial in times of peace. May the Government be damned for it.

Roedd e’n dysgu Cymraeg, gyda llaw, achos ei fod yn berchen ar tŷ haf yn sir Benfro ac mae e a’i wraig yn bwriadu symud i Gwm Gwaun i fyw unwaith mae e wedi ymddeol o wleidyddiaeth (ym mis Mai, mae’n debyg). Dw i ddim yn gallu meddwl o fewnfudwr byddwn i’n fwy hapus i’w groesawu, a dw i’n falch iawn y cefais i’r braint o ddod i’w nabod tipyn bach yn ystod y pythefnos oedd e yn fy nosbarth. Dw i’n fawr gobeithio y bydda i’n cael cwrdd â fe ‘to, prynu’r peint sy arna i iddo fe, a falle clywed mwy o’i storïau am Llew Smith.

Trwy BoingBoing.

Gol. 27/02/05
Dyma MP3 o’r araith. 8MB, mae’n flin ’da fi. Dylwn i fod wedi lleihau’r bitrate, ond dw i’n rhy flinedig nawr.

Bone up on Your Welsh

Postiwyd ar gan

(Hen newyddion, ond dw i wedi bod yn fishi…)

Colin and Cumberland yw ymgais diweddaraf y Beeb i wneud dysgu Cymraeg yn cwl. Y peth rhyfedd yw, mae e’n wych, a sdim rhaid bod yn ddysgwr i’w mwynhau. Dim ond un pennod sydd ar gael hyd yn hyn, ond mae hwnna yn arbennig o dda, os wyt ti’n gallu anghofio’r ffaith taw Stuart Cable sy’n wneud llais Colin – rhywbeth do’n i ddim wedi sylweddoli nes i mi ddarllen hwn.

Mor braf i weld rhywbeth sy’n derbyn bod ’na rhywbeth braidd yn afreal am ddysgu iaith fel y Gymraeg, ac os wyt ti’n mynd i’w wneud, man a man wneud e am resymau gwirion fel dy fod di wedi twyllo dy ffordd i mewn i job fel DJ yn y “language slot” ar orsaf lleol, heb air o Gymraeg, ac mae dy gi yn gorfod wneud y gwaith drostot ti, ac yntau’n Sais a ti yn gyn-drymiwr gyda’r Stereophonics ac yn Gymro proffesiynol sydd, yn erbyn pob disgwyl yn llai pryfoclyd erbyn hyn na’r band gadawest ti, er taw ti oedd yr aelod mwya pryfoclyd ar y pryd.

Ers pryd ydw i’n amddiffyn Stuart Cable?

Ers i mi weld fy nhad cerdded i gwrdd â ni heddi, a siarad fel normal, ac edrych ymlaen at ddod yn well byth, yn lle marw cyn gynted â phosib os gwelwch yn dda. Mae ’na bethau waeth yn y byd na chyn-ddrymwyr y Stereophonics, hyd yn oed os ydyn nhw’n methu galw bandiau Oes Auraidd Roc gan eu henwau go iawn: “The Purps”, “The Sabs”, “The ‘DC” ac yn y blaen.

Waw. Mewn un frawddeg yna des i’n agos at ddarbwyllo fy hun bod Stuart Cable yn waeth na chanser, wedi’r cwbl. Rhaid mod i’n fwy blinedig nag o’n i’n meddwl.

Paid gwrando arna i. Cer i wylio Colin a Cumberland.

Colin and Cumberland

Diolch i Rhys Wynn.

Postiwyd yn Heb gategori | Tagiwyd

Collnodiadau bach yn rhy glyfar

Postiwyd ar gan

Newydd sylweddoli bod WordPress yn troi dyfynodau sengl yn gyrliog yn awtomatig, sy’n gweithio yn iawn yn Saesneg, ond sy’n edrych yn od mewn cydestun Cymraeg lle mae geiriau sy’n dechrau gyda collnod, fel yr un ’ma.

Mae MS Word yn wneud pethau fel hyn, ac mae rhaid wneud dau gollnod, ac wedyn dileu’r un cyntaf, os wyt ti am dy gollnodiadau i fod yn gall.

Bydd rhaid ffeindio ffordd handi i ddysgu WP sut i handlo collnodiadau blaenorol yn y Gymraeg. Neu alla i fynd yn ôl at fy hen arfer o ddefnyddio’r entities HTML, fel o’n i’n wneud nôl yn y dyddiau pan oedd pethau fel hynny yn fy moddran i. Neu ai dim ond fi sy’n meddwl bod y gair ’ma yn edrych yn well na’r un ‘ma?

Gol. ‘Sdim byd i’w weld ’ma, symud ymlaen.