Fe aethon ni lan i Hermon Sir Gâr (“Hermon y bwyd”) nos Fawrth, ar gyfer recordiad Y Talwrn. (Mae fy nghariad mewn tîm. Tîm go dda, ‘fyd.) Unwaith eto, bues i’n un o’r rhai ifancaf yn y lle. Ydy hyn yn wir ym mhob rhan o Gymru, tybed, taw dim ond y to hynaf sy’n mynychu pethau fel hyn? Mae’n debyg bod mwy o bobl ifancach yn sgwennu barddoniaeth nag sy’n mynd mas gyda’r nos i’w chlywed.

Wedi dweud hynny, roedd y lle dan ei sang, a chawson ni ddwy ornest wych. Dw i’n edrych ymlaen at weld y tasgiau ar wefan y Talwrn, i mi eu deall o’r diwedd.

Y Talwrn
Unwaith, bu ar ein sgrinau, ond yr oedd
Yn rhy drwm ei geiriau;
Rhy gefn gwlad ei threigladau
Rhy Gymreig i gamerau.
Ceri Wyn Jones

Ai dilanwadu chwaeth diwylliannol pobl Cymru dylai S4C drial wneud, neu’i adlewyrchu? Dw i’n credu ur un cyntaf, ond mae’n hawdd i weld sut allen nhw feddwl fel arall, a mynd am y nodwedd cyffredin isaf bob tro.

[Cofnod hir, i fi. Rhowch glec yma i ddarllen yr holl beth.]

[English version of this post. Diolch Rhys!]

Mae sawl person wedi sgwennu ata i yn diweddar i dynnu fy sylw at y newyddion am Office Microsoft yn y Gymraeg, rhywbeth sy wedi ei drafod ar maes-e ers cwpl o fisoedd bellach. Y peth yw, dw i ddim yn gweld hyn fel cam positif iawn, dim ond enghraifft arall o Microsoft anwybyddu hawliau ieithyddol siaradwyr ieithoedd bychain nes iddyn nhw weld ffordd i wneud elw mawr mas o’r peth a wneud yn siwr bod pobl yn parhau fel cwsmeriad fyddlon i gynnyrch Microsoft. Yn yr achos yma, mae Cymdeithas yr Iaith ac eraill wedi bod yn llythyru MS am flynyddoedd gan alw am fersiwn Cymraeg o’u meddalwedd monopolaidd. Ymateb MS, tan yn diweddar oedd “There’s not enough of you to make it worth our while, sorry.” A chan fod nad oedd dewis ’da’r Cymry ond i ddefnyddio meddalwedd Microsoft, doedd dim rhaid iddyn nhw (MS) newid eu meddwl naci eu meddalwedd.

Ond arhoswch! Beth yw hyn?
Continue reading →